యా కున్దేన్దు-తుషారహార-ధవలా యా శుభ్ర-వస్త్రావృతా
యా వీణావరదణ్డమణ్డితకరా యా శ్వేతపద్మాసనా ।
యా బ్రహ్మాచ్యుత-శంకర-ప్రభృతిభిర్దేవైః సదా పూజితా
సా మాం పాతు సరస్వతీ భగవతీ నిఃశేషజాడ్యాపహా ॥ ౧॥
దోర్భిర్యుక్తా చతుర్భిః స్ఫటికమణిమయీమక్షమాలాం దధానా
హస్తేనైకేన పద్మం సితమపి చ శుకం పుస్తకం చాపరేణ ।
భాసా కున్దేన్దు-శంఖస్ఫటికమణినిభా భాసమానాఽసమానా
సా మే వాగ్దేవతేయం నివసతు వదనే సర్వదా సుప్రసన్నా ॥ ౨॥
ఆశాసు రాశీ భవదంగవల్లి
భాసైవ దాసీకృత-దుగ్ధసిన్ధుమ్ ।
మన్దస్మితైర్నిన్దిత-శారదేన్దుం
వన్దేఽరవిన్దాసన-సున్దరి త్వామ్ ॥ ౩॥
శారదా శారదామ్బోజవదనా వదనామ్బుజే ।
సర్వదా సర్వదాస్మాకం సన్నిధిం సన్నిధిం క్రియాత్ ॥ ౪॥
సరస్వతీం చ తాం నౌమి వాగధిష్ఠాతృ-దేవతామ్ ।
దేవత్వం ప్రతిపద్యన్తే యదనుగ్రహతో జనాః ॥ ౫॥
పాతు నో నికషగ్రావా మతిహేమ్నః సరస్వతీ ।
ప్రాజ్ఞేతరపరిచ్ఛేదం వచసైవ కరోతి యా ॥ ౬॥
శుద్ధాం బ్రహ్మవిచారసారపరమా-మాద్యాం జగద్వ్యాపినీం
వీణాపుస్తకధారిణీమభయదాం జాడ్యాన్ధకారాపహామ్ ।
హస్తే స్పాటికమాలికాం విదధతీం పద్మాసనే సంస్థితాం
వన్దే తాం పరమేశ్వరీం భగవతీం బుద్ధిప్రదాం శారదామ్ ॥ ౭॥
వీణాధరే విపులమంగలదానశీలే
భక్తార్తినాశిని విరించిహరీశవన్ద్యే ।
కీర్తిప్రదేఽఖిలమనోరథదే మహార్హే
విద్యాప్రదాయిని సరస్వతి నౌమి నిత్యమ్ ॥ ౮॥
శ్వేతాబ్జపూర్ణ-విమలాసన-సంస్థితే హే
శ్వేతామ్బరావృతమనోహరమంజుగాత్రే ।
ఉద్యన్మనోజ్ఞ-సితపంకజమంజులాస్యే
విద్యాప్రదాయిని సరస్వతి నౌమి నిత్యమ్ ॥ ౯॥
మాతస్త్వదీయ-పదపంకజ-భక్తియుక్తా
యే త్వాం భజన్తి నిఖిలానపరాన్విహాయ ।
తే నిర్జరత్వమిహ యాన్తి కలేవరేణ
భూవహ్ని-వాయు-గగనామ్బు-వినిర్మితేన ॥ ౧౦॥
మోహాన్ధకార-భరితే హృదయే మదీయే
మాతః సదైవ కురు వాసముదారభావే ।
స్వీయాఖిలావయవ-నిర్మలసుప్రభాభిః
శీఘ్రం వినాశయ మనోగతమన్ధకారమ్ ॥ ౧౧॥
బ్రహ్మా జగత్ సృజతి పాలయతీన్దిరేశః
శమ్భుర్వినాశయతి దేవి తవ ప్రభావైః ।
న స్యాత్కృపా యది తవ ప్రకటప్రభావే
న స్యుః కథంచిదపి తే నిజకార్యదక్షాః ॥ ౧౨॥
లక్ష్మిర్మేధా ధరా పుష్టిర్గౌరీ తృష్టిః ప్రభా ధృతిః ।
ఏతాభిః పాహి తనుభిరష్టభిర్మాం సరస్వతీ ॥ ౧౩॥
సరసవత్యై నమో నిత్యం భద్రకాల్యై నమో నమః
వేద-వేదాన్త-వేదాంగ- విద్యాస్థానేభ్య ఏవ చ ॥ ౧౪॥
సరస్వతి మహాభాగే విద్యే కమలలోచనే ।
విద్యారూపే విశాలాక్షి విద్యాం దేహి నమోస్తు తే ॥ ౧౫॥
యదక్షర-పదభ్రష్టం మాత్రాహీనం చ యద్భవేత్ ।
తత్సర్వం క్షమ్యతాం దేవి ప్రసీద పరమేశ్వరి ॥ ౧౬॥
॥ ఇతి శ్రీసరస్వతీ స్తోత్రం సమ్పూర్ణం॥